" پس برك "

هَر دلي تنها بمونه آخه ورداره تَرك

دَسَ و دَسِ يَك بديمون تا نَپاشيمون وَ يَك

ياد ايلُ و فَصلِ سوُزِ ايلَ بالا ايلَ زير

پيرمِردِ صد و بالا ني نها زر چِل چَمَك

عِشق رفتن كَس نداره بُنگ بِرنو دَرنيا

تُف وَ مِن ذاتت بيايه تُف و من ذاتت فلك

هر دَقي صَد ديْده گوري وَت بِدم بازم كمه

كَم  بپاشَن مِن لا وَليْ زَخمُم  نَمك

منْ بتُم بُغضي غريبه ، تَنگ وابيده دلم

سي جَري نوني وُ قيري ديم و سي مُشتي گْمَك

ريشه بايد رُند مث دارِ بَلي ، دار كنار

وا مصيبت ،مَرد كُوچُه پا پَسا  بو، بي يه چَك

هر علف هرزي نه ، بايد وركني وُ وِرْ بدي

جوُن چَلتيك ايگره منْ كُرته سَگ مَذهب گَرَكْ

هم بميري صَد برابر خَشترِ ، خشتر كه تو

سَر كني  زِندي تَه  من آشغال دُوني  بي  كدك

سُومُ  و سَرمي سَخت من رَهيه تَشي آماده كُن

پُشت سَر پيز ايده طيفوني نَفَس گِر ، پَس بَرك

وقتشه ايمون بياريمون و تَش عِشق بَلي

تا  وَ  گردن  دِل  نَمونه  دَم  دَقه اوسار شَك

زلتري تَش بُر كنيمون دِل بُونديمون و تَش

قَدر گرما شه  بِفهميمون ، نزنمون ِزر دلك

انصاري فهلياني